Дзеля будучыні

Учора ў сталіцы завяршылася XVIII Рэспубліканская выстава навукова-метадычнай літаратуры, педагагічнага вопыту і творчасці навучэнскай моладзі. На працягу трох дзён (з 17 па 19 красавіка) на пляцоўцы выставачнага цэнтра “БелЭкспа” педагогі з усіх рэгіёнаў краіны дзяліліся з калегамі і шматлікімі наведвальнікамі вопытам выхаваўчай работы, фарміравання ў навучэнцаў любові да роднага краю. Тэма любові да бацькоўскай зямлі невыпадкова стала лейтматывам выставы, паколькі праходзіла мерапрыемства ў Год малой радзімы.

Адукацыя дзеля будучыні краіны — такім быў своеасаблівы дэвіз выставы. І гэта таксама невыпадкова. Дзеля будучыні нашай краіны і нашага народа (сённяшніх хлопчыкаў і дзяўчынак, а заўтра — прафесіяналаў, сапраўдных грамадзян) і працуюць педагогі, здзяйсняючы кожны дзень маленькія, але вельмі важныя подзвігі. Выхаваць грамадзяніна, чалавека, які аддана любіць малую радзіму, гатовы сваёй працай у самых розных галінах і сферах праслаўляць нашу Беларусь. Хіба гэта не подзвіг? Заўважыць і раскрыць талент дзіцяці ў тэхнічнай творчасці, занятках фізічнай культурай, у краязнаўстве, мастацкай творчасці — гэта таксама подзвіг. Уся выхаваўчая работа, што праводзіцца ва ўстановах агульнай сярэдняй, прафесійна-тэхнічнай, сярэдняй спецыяльнай, вышэйшай адукацыі, дадатковай адукацыі дзяцей і моладзі, накіравана на будучыню краіны.

Прэзентацыя вопыту такой работы і адбывалася на тэматычных пляцоўках “БелЭкспа”. З некаторымі найбольш яркімі момантамі выставы прапануем азнаёміцца на старонках красавіцкага “Шостага дня”.

Ігар ГРЭЧКА.
Фота аўтара.