Сябры пагранічнікаў

У нашай школе з 1962 года працуе атрад юных сяброў пагранічнікаў, мэтай якога з’яўляецца дапамога пагранічнікам у ахове і абароне дзяржаўнай мяжы. Заняткі з навучэнцамі праводзяцца з удзелам афіцэраў 10-й пагранічнай заставы Гродзенскага пагранатрада. У перыяд летніх канікул на базе заставы ўжо больш за 5 гадоў працуе 9-дзённы ваенна-патрыятычны лагер з кругласутачным знаходжаннем дзяцей “Юны пагранічнік”, у якім праходзяць ваенную падрыхтоўку і з карысцю адпачываюць хлопчыкі як з нашай школы, так і з іншых школ Бераставіцкага раёна.

Раніцай 4 ліпеня лагер зноў расчыніў свае дзверы для 15 хлопчыкаў 11—13 гадоў, якіх аб’ядноўвае цікавасць да пагранічнай службы, абароны дзяржаўнай мяжы. У гэтым годзе для дзяцей быў распрацаваны праект змены “Юны абаронца Айчыны”. Кожны дзень вучняў чакалі цікавыя і займальныя мерапрыемствы, падрыхтаваныя важатай Аленай Місюкавец, практычныя заняткі, распрацаваныя начальнікам заставы Канстанцінам Сідарэнкам, а таксама заняткі па інтарэсах і спартыўныя спаборніцтвы, падрыхтаваныя настаўнікам фізічнай культуры і здароўя Віктарам Трушам. Юныя пагранічнікі дэманстравалі веды і інтуіцыю ў брэйн-рынгу “Турнір кемлівых” і інтэлектуальнай гульні “Жыву ў Беларусi i тым ганаруся”, паказвалі спрыт у квест-гульні “Наш выбар — здароўе”, якая праводзіцца Бераставіцкім цэнтрам творчасці дзяцей і моладзі.

Вайскоўцамі заставы праведзены цыкл практычных заняткаў, падчас якіх хлопцы знаёміліся з гісторыяй з’яўлення кантрольна-следавой паласы, слядамі жывёл і чалавека. Дзеці практыкаваліся ў змазцы, зборцы і разборцы аўтамата за пэўны час. Таксама на практычных занятках адпрацоўвалася страявая падрыхтоўка, спосабы арыентавання на мясцовасці, рух па азімуце, адбывалася знаёмства з абавязкамі дзяжурнага па заставе, методыкай і тэхнікай дрэсіроўкі сабак. Вучні з задавальненнем размаўлялі з салдатамі, з цікавасцю назіралі, як яны жывуць, нясуць службу. Вялікая ўвага ўдзялялася фарміраванню ў дзяцей навыкаў здаровага ладу жыцця. Хлопцы спаборнічалі з вайскоўцамі ў настольным тэнісе, міні-футболе, валейболе, армрэслінгу, баскетболе. Займальна і цікава прайшла акцыя “Мы выбіраем здаровы лад жыцця”, падчас якой юныя абаронцы Айчыны выдавалі і распаўсюджвалі сярод вайскоўцаў лістоўкі “Будзь здаровы!”, удзельнічалі ў гульні-віктарыне “Разам супраць наркотыкаў” і конкурсе плакатаў “Здаровы лад жыцця — гэта…”.

Падчас адпачынку ў лагеры вучні не толькі спасцігалі азы пагранічнай службы, але і шмат падарожнічалі. Юнармейцы наведалі школьны краязнаўчы музей “Вытокі” ў Малой Бераставіцы, Музей вавёркі ў Вялікай Бераставіцы, Ваўкавыскі ваенна-гістарычны музей імя П.І.Баграціёна. Дырэктар лагера Алена Татарыновіч арганізавала прафарыентацыйныя экскурсіі ў раённы аддзел унутраных спраў і раённы аддзел па надзвычайных сітуацыях.

Дзевяць дзён, праведзеных у лагеры, падарылі дзецям шмат цікавых ведаў, яркіх уражанняў, пазітыву. Хлопцы зразумелі, што дзяржаўная мяжа — гэта месца, дзе захоўваецца бяспека нашай краіны. І ўнесці ўклад у гэтую бяспеку павінен кожны грамадзянін.

Таццяна ПАЛАНЕЙЧЫК,
намеснік дырэктара па выхаваўчай рабоце
сярэдняй школы Пагранічнага Бераставіцкага раёна.