Адзін раз убачыць

Ваенна-гістарычная рэканструкцыя падзей мінулага дазваляе дзецям адчуць рэальнасць таго, што адбываецца, прыналежнасць да далёкіх падзей Вялікай Айчыннай вайны, бо для сучаснай моладзі куды больш цікава патрымаць у руках мадэль кулямёта, рэвальвера, прымераць каску або пілотку, пасядзець у бліндажы або пакаштаваць ваенную кашу, чым слухаць павучанні педагогаў.

Другі год запар педагагічныя работнікі ўстаноў адукацыі Лоеўскага раёна Гомельскай вобласці, сістэмы аховы здароўя, аддзела культуры і па справах моладзі Лоеўскага райвыканкама арганізоўваюць рэканструкцыі ваенных падзей на пляцоўках горада: “Партызанскі атрад”, “Медсанбат”, “На прывале: салдацкая кухня”. Атрыбуты для арганізацыі рэканструкцый былі знойдзены ў школьных музеях, музейных пакоях, арганізаваных пры ўстановах адукацыі раёна, у асабістых рэчах бабуль і дзядуляў дзяцей.
Трэба бачыць вочы хлопцаў і дзяўчат, калі яны глядзяць на сваіх педагогаў, медыцынскіх работнікаў або бацькоў у ваеннай форме чырвонаармейца часоў Вялікай Айчыннай вайны, члена партызанскага атрада або медыцынскай сястры. Навучэнцы зрабілі важную агульную справу ў пошуках атрыбутаў і арганізацыі рэканструкцыі падзей.

Наталля ПАЎЛІЎСКАЯ,
загадчык раённага вучэбна-метадычнага кабінета
аддзела адукацыі, спорту і турызму Лоеўскага райвыканкама.