Для любімай мамы

Кастрычнік, сярэдзіна восені. Сімвалічна, што Дзень маці адзначаецца менавіта ў гэтую пару года, калі на календары — адно з галоўных хрысціянскіх свят, а дрэвы за акном усыпаюць зямлю золатам лістоты. Гэтак жа і вы, дарагія мамы, шчыра абдорваеце наша жыццё клопатам сваіх залатых рук, сваімі ласкавымі ўсмешкамі. Без гэтага клопату і ўсмешак, без вашай дапамогі мы наўрад ці дасягнулі б жыццёвых вяршынь. Шкада, што пачынаем разумець гэтую ісціну часцей за ўсё ў сталым узросце. І як добра, калі пра ролю мамы дзеці задумваюцца ўжо з маленства, як, напрыклад, навучэнцы Рэспубліканскага цэнтра інавацыйнай і тэхнічнай творчасці.

Дзеля сваіх любімых матуль гэтыя хлопчыкі і дзяўчынкі, якіх вы бачыце на фотаздымках, гатовы спачатку пасля школьных заняткаў ехаць у дажджлівы восеньскі дзень праз увесь вялікі горад, а потым на працягу дзвюх гадзін засяроджана працаваць за партамі. З дапамогай нажніц, паперы і фламастараў яны не толькі асвойваюць элементы пачатковага тэхнічнага мадэлявання, але і ствараюць падарункі да Дня маці. Канечне, найлепшы падарунак — гэта ўвага. Аднак, калі яна будзе падмацавана шчырымі, ласкавымі словамі, матэрыялізаванымі ў прыгожы надпіс на яркай паштоўцы, якую прынясе маме створаны рукамі дзяцей макет кардоннага карабліка, тады падарунак будзе асабліва каштоўным.

Як адзначыла педагог-арганізатар РЦІТТ Наталля Фёдараўна Шкварко, заняткі па стварэнні падарункаў — гэта толькі невялікая частка тых мерапрыемстваў, якія кожны год вядучая ў краіне ўстанова дадатковай адукацыі дзяцей і моладзі тэхнічнага профілю праводзіць для сваіх навучэнцаў падчас тыдня маці. Гэта і акцыя “Святло мацярынскай душы”, і заняткі “Радасць мамам”, “Каля сонейка — светла, каля матулі — добра”, і размова з падлеткамі пра тое, як у свеце адзначаюць Дзень маці, гэта і экскурсіі для матуль у Інфармацыйны цэнтр па атамнай энергіі.

Жыццёвая дарога ў кожнага чалавека няпростая, пакручастая, аднак чамусьці здаецца, што гэтыя папяровыя караблікі, створаныя героямі нашага фотарэпартажу, вытрымаюць любыя штормы, любыя жыццёвыя буры, бо рабіліся ад шчырага сэрца, для любімых матуль.

Ігар ГРЭЧКА.
Фота Алега ІГНАТОВІЧА.