Пра хлопчыкаў, пра дзяўчынак

“Ровесницы, ровесники, // Девчонки и мальчишки, // Одни поём мы песенки, // Одни читаем книжки…” Памятаеце пачатак знакамітай песні? Сапраўды, ва ўсе часы равеснікі спяваюць адны і тыя ж песні, чытаюць адны і тыя ж кніжкі. Здаецца, што захапленні і светаўспрыманне і ў хлопчыкаў, і ў дзяўчынак павінны быць аднолькавымі. Але гэта не так. Хлопчыкі і дзяўчынкі — два розныя сусветы. І чым старэйшымі становяцца вучні, тым гэтыя адрозненні больш відавочныя. Як выхоўваць хлопчыкаў? Як выхоўваць дзяўчынак? Сваімі думкамі падзеляцца героі лютаўскага “Шостага дня”.

Тое, што ў хлопчыкаў і дзяўчынак адметны погляд на адны і тыя ж рэчы, пацвердзіў Рэспубліканскі конкурс “ТэхнаЁлка”, вынікі якога нядаўна падведзены ў Рэспубліканскім цэнтры інавацыйнай і тэхнічнай творчасці. Паглядзіце на фотаздымкі. Як вы думаеце, вось гэты брутальны жоўты дзік з металічнага лому і дэталей машын, што заняў 1-е месца ў намінацыі “Сімвал 2019 года”, створаны рукамі дзяўчат або хлопцаў? Правільна, хлопцаў, навучэнцаў Смілавіцкага сельскагаспадарчага прафесійнага ліцэя. А кампазіцыя “Час цудаў”? Правільна, дзяўчыны, навучэнкі Гомельскага дзяржаўнага прафесійнага ліцэя чыгуначнага транспарту Ксеніі Краснеўскай. А незвычайная “Ёлка егіпецкага фараона”, тая, што з чорным контурам далоні? Тут таксама нескладана здагадацца: аўтарам з’яўляецца дзяўчына. Гэта Ірына Жынко з сярэдняй школы № 2 Светлагорска. У Ірыны атрымалася не проста арыгінальная ёлка, а сапраўдная ўсходняя казка.

— Конкурс, які праводзіўся чацвёрты раз, з кожным годам становіцца больш папулярным, у тым ліку сярод устаноў дадатковай адукацыі. Калі ў першы год на фінал паступіла 208 работ, то ў гэтым — 383, што на 64 больш, чым у мінулым. Нядзіўна, што экспертная камісія закончыла падводзіць вынікі конкурсу нядаўна. Работы дасылаліся ў намінацыях “Дызайн-ёлка”, “Калядная кампазіцыя”, “Навагодні сувенір”, “Святочнае ўпрыгажэнне”, “Сімвал 2019 года”. Пры ацэнцы кожнай работы ўлічвалася яе тэхнічнае рашэнне. Важным фактарам была якасць і складанасць выканання, практычнасць і надзейнасць, арыгінальнасць задумкі, правільнае афармленне тэхнічнай дакументацыі, — паведаміла загадчык аддзела выставачнай і прэзентацыйнай работы РЦІТТ Марыя Уладзіміраўна Радкевіч.

Агульнае ўражанне ад знаёмства з выставай наступнае: аўтары брутальных работ, дзе ў якасці матэрыялаў выкарыстаны дэталі машын, механізмы, — хлопцы, а вось работы элегантныя, вытанчаныя — гэта справа дзявочых рук. Але не заўсёды. Элегантныя работы сустракаліся і ў хлопцаў, а брутальнасці хапала і ў работах дзяўчат. Усё ж такі мужчына і жанчына — гэта два розныя сусветы, але яны дапаўняюць адзін аднаго.

Ігар ГРЭЧКА.
Фота Алега ІГНАТОВІЧА.